میدان ناہوت 

کبھی کبھار یوں ہوتا ہے کہ نہ جنت لبھاتی ہے، نہ دوزخ ڈراتی ہے

نہ کمال کی چاہ باقی رہتی ہے، نہ فرار کا خواب 

بس دل ایک ٹھہری ہوئی خاموشی مانگتا ہے

ایسی خاموشی جہاں روح  سکون کا سانس لے سکے۔

 پانی آنکھ سے بہہ کر حلق میں اتر آیا ہے

" خدا اور شیطان، دونوں کی شرط ایک ہی ہے " وفا

(راست)

 وقت سے زخم تو بھر جاتے ہیں مگر ان زخموں کی درد کی شدت

 انسان صرف تب بھولتا ہے جب منزل پر پہنچ جاتا ہے

(راست)

 ظاہری شکل اور اندر کے جذبات میں ہم آہنگی نہ ہو تو آپ لوگوں کے لیے

 غیر اہم یا ایک مذاق ہی رہتے ہیں

 (راست)

 لوگ مایوسی سے نہیں مرتے، مگر امید کی تھکن انہیں مار دیتی ہے

(راست)

لوگوں سے تعلق اتنا ہی رکھو جتنی ان کی نظروں میں آپ کی عزت ہے

(راست)

 محبت میں عموماً ایک عاشق اور دوسرا محبوب ہوتا ہے

اس نسبت سے رشتہ بہترین چل سکتا ہے 

اور اس سے بھی ایک بہتر نسبت یہ ہے کہ جب دو لوگوں کو محبت ہو جائے

 اور دونوں ہی ایک دوسرے کے عاشق ہوں اور اگر دونوں ہی محبوب بن جائیں 

تو محبت تو شاید رہتی ہے مگر رشتہ چلے گا یا نہیں اس کی کوئی ضمانت نہیں

(راست )

 تجھے دیکھ کر سبھی کو غیراہم کردیا میں نے

یہ غمِ زندگی ہے لیکن، اسے وہم کر دیا میں نے

(راست)

یکطرفہ محبت ہوش کی دنیا میں ہمیشہ اداس رہتی ہے 

(راست)

پاگل کی محبت 

 پاگل ہوں، یہ محبت کی زباں کیا جانو

یہ دل کی لگی، یہ جہاں کیا جانو 

ریزہ ریزہ سی عقل لیے اپنے وجود میں

 یہ دل کا دھڑکنا اور تیری دھودکار کیا جانو 

(راست)

یہ شاعری ایک ایسے شخص کے لیے وقف ہے جسے معاشرہ "پاگل" کہتا ہے۔ حالانکہ وہ اپنے جذبات کو بیان کرنے یا مکمل طور پر سمجھنے کے قابل نہیں ہے، لیکن اس کے پاس بھی ایک دل ہے جو ہر دوسرے دل کی طرح دھڑکتا ہے۔ محبت، جو سب کے لیے یکساں ہے اور کسی فرق کو نہیں مانتی، اسے بھی چھوتی ہے اور اپنے نشان کے طور پر درد چھوڑ جاتی ہے۔ وہ اپنی تکلیف کی گہرائی کو بیان نہیں کر سکتا اور نہ ہی اس کے حدود کو سمجھ سکتا ہے، لیکن محبت کا درد اسکے اندر بھی اتنی ہی شدت سے رہتا ہے جتنا کسی اور کے دل میں جب کہ اسے صحیح سے انکار کا مطلب بھی نہیں معلوم

 تیرا انتظار کروں گا، مگر شام تک نہیں 

محبت لاکھ سی، پر تو صبح کا بھولا نہیں 

ہاں مان لیا تیری مجبوریاں ہیں بہت 

مگر یوں میرا دل توڑنا اور ملال بھی نہیں ؟

(راست )

دل اور دماغ کے درمیان فرق صرف ایک وجہ کا ہے

کیونکہ دل جوچاہتا ہے اس کی کوئی وجہ نہیں ہوتی

 جبکہ دماغ جو چاہتا ہےاس کی ہر بار کوئی وجہ ہوتی ہے

(راست)

 اس کے لہجے میں زمانے کی خنک آ گئی تھی

اورعقلمند کو اشارے کی سمجھ آ گئی تھی

رات کی تاریکی میں سارے خط جلا دیے ورنہ

رسوائی تھی کہ دروازے تلک آ گئی تھی

(راست)

محبت دل کا شعوری جذبہ ہے

اور عشق لاشعور اور شعور سے پرے ہے

 اس میں وجود کا دخل نہیں

 یہ ایک روح سے دوسری روح کے تعلق کا نام ہے

(راست)

 ہم کتنے ہی عقل مند ،تجربہ کار اور عمر رسیدہ ہو جائیں

 مگر محبت ہمیں بے عقل ،اناڑی اور بچہ بنا ہی دیتی ہے

 (راست)

 کبھی کبھی انسان کو یہ خیال آتا ہے کہ

 اگر وہ اپنے محبوب کی پرچھائی بن جائے تو شاید اسے 

وہ قربت اور لمحات میسر آ سکیں جن میں خالص خوشی کا تجربہ ہو۔ 

مگر پرچھائی بنتے بنتے، وہ اپنے وجود کو اس حد تک مٹا دیتا ہے کہ

 خود کو چراغ تلے اندھیرا بنا لیتا ہے

جہاں زندگی کی بجائے موت کا سا احساس ہوتا ہے

(راست)

 کبھی کبھار آپ کے وجود کا مقصد ایک مختصر لمحے میں پوشیدہ ہوتا ہے 

جو کسی اور کی زندگی کو حقیقی معنی بخش دیتا ہے۔

(راست)

 خوشی ایک ایسی کیفیت ہے جو انسان کے اندرونی احساسات اور دل کی حالت سے منسلک ہے۔ اکثر ہم سمجھتے ہیں کہ دولت، شہرت، مقام، صحت، اور دیگر مادی چیزیں ہمیں خوشی فراہم کریں گی، مگر یہ سب محدود خوشی دیتے ہیں۔ انسان کی اصل خوشی اس کی من پسند چیزوں میں ہوتی ہے، چاہے وہ چیزیں بظاہر ناممکن یا ممنوع ہی کیوں نہ ہوں۔

اگر ہم اپنی نفس کی خواہشات کو حقیقی خوشی کا معیار نہ سمجھیں اور ان کو الگ کر دیں تو سوال یہ پیدا ہوتا ہے کہ بچ جانے والی خوشی کی کیا نوعیت ہے؟ کیا یہ باقی رہ جانے والی خوشی ہمارے لیے کافی ہے، یا اصل خوشی ہماری اپنی مرضی اور من چاہی چیزوں میں پوشیدہ ہے؟

اضطراب کی کیفیت میں انسان کا ہر وقت خوشی کی تلاش میں رہنا خوشی کا ایک لالچ ہے

یا دکھ کا انتہائی ڈد جو ذہن میں کہیں ایسا خوفناک وجود رکھتا ہے کہ اس کے ڈر سے ہم ہر وقت خوشی کی تلاش میں رہتے ہیں

فرض کریں کہ اگر خوشی اور دکھ جیسی کیفیتیں موجود نہ ہوں تو پھر انسان کی خواہشات بھی بے معنی ہو جائیں گی، کیونکہ یہ احساسات ہی ہمیں کچھ حاصل کرنے یا اس کی جستجو میں لگے رہنے کی وجہ فراہم کرتے ہیں۔ انسان کو کچھ حاصل کرنے کی تحریک تب ہی ملتی ہے جب اس کے دل میں کسی شے کی کمی کا احساس ہو۔ خوشی اور دکھ کے بغیر، یہ کمی کا احساس ختم ہو جائے گا اور شاید زندگی کی جستجو بھی مدھم ہو جائے۔

ایسا محسوس ہوتا ہے کہ خوشی اور دکھ ہماری زندگی کے سفر کے اہم عناصر ہیں۔ یہ دونوں جذبات ہمیں انسان ہونے کا احساس دلاتے ہیں اور ہماری زندگی ۔کو مقصد اور تحریک فراہم کرتے ہیں۔

سوال پھر بھی وہیں موجود ہے کہ "اصل میں خوشی کیا ہے؟" کچھ لوگ خوشی کو روحانیت سے جوڑ کر اسے خدا کی رضا کا نام دیتے ہیں۔ لیکن جو لوگ خدا کے وجود کو نہیں مانتے یا اس سے ناواقف ہیں، ان کے لیے خوشی کا مفہوم کیا ہو سکتا ہے؟ شاید اُن کے نزدیک خوشی کا مطلب محض ان چیزوں میں ہوتا ہے جن کا تصور کرتے ہی دل میں مسرت کی لہر دوڑتی ہے، اور کچھ چیزیں ایسی ہوتی ہیں جن کا خیال آتے ہی دل اداس ہو جاتا ہے۔

ہم نے اپنی زندگی میں جذبات کو بھی اسی طرح تقسیم کر رکھا ہے—کچھ جذبات ہمیں خوشی دیتے ہیں اور کچھ دکھ۔ اگر یہ تفریق ختم ہو جائے تو شاید ہر چیز خوشی بن جائے، یا یوں کہہ لیں کہ ہم ہر چیز میں خوشی تلاش کرنا سیکھ جائیں۔ 

یہ بھی ہو سکتا ہے کہ خوشی کسی ایک مخصوص احساس یا چیز سے جڑی نہ ہو بلکہ یہ ہمارا نظر کا زاویہ ہو جو اسے جنم دیتا ہے۔ جب ہم خوشی اور غم کی حدود کو مٹا دیتے ہیں، تب زندگی کی ہر کیفیت خوشی کے کئی معانی اور پہلو ہو سکتے ہیں، اور یہ ہر انسان کے تجربات اور خیالات کے مطابق مختلف ہو سکتی ہے۔ میرے خیال میں خوشی وہ کیفیت ہے جب انسان خود سے مطمئن ہوتا ہے، اپنے وجود اور زندگی کے حالات کو قبول کر لیتا ہے۔ یہ کوئی لمحاتی مسرت یا عارضی لطف نہیں بلکہ ایک اندرونی سکون اور اطمینان کی حالت ہے۔

کبھی یہ احساس ہمیں اپنے اردگرد کے لوگوں سے ملتا ہے، کبھی کسی خاص مقصد کو پا کر، اور کبھی سادہ لمحات میں جیسے قدرت کی خوبصورتی کو محسوس کر کے۔ کچھ کے لیے یہ روحانی تجربہ ہے تو کچھ کے لیے زندگی کی چھوٹی چھوٹی کامیابیاں۔ 

خوشی شاید کسی ایک چیز کا نام نہ ہو، بلکہ ایک ایسا جذبہ ہے جسے ہم اپنی زندگی میں مختلفم

 مواقع اور تجربات کے ذریعے دریافت کرتے ہیں جوایک خوشی کا حصہ بن سکتی ہے 

(راست)